AaroNation 魔力．城．國度

舞皇降臨







一出場就全場high爆。

噚晚楊千嬅嘅《Let's Begin 世界巡迴演唱會2015》喺紅館準時開騒，全場爆滿，前晚容祖兒做千嬅嘅嘉賓，已經令到全場觀眾非常驚喜，而喺噚晚出場嘅郭富城，更令全場觀眾企起身跳舞同尖叫。

而喺演唱會「安哥」部份，「舞台皇者」郭富城現身，即引起全場大合唱《對你愛不完》，城城說：「點解我揀呢首歌?因為我知道千嬅好幸福，有你哋支持佢，所以對你愛不完。」城城又爆千嬅秘密練舞，佢話：「千嬅真係好勤力，佢喺我排舞室練習，有一日我返到去做自己嘢，聽到佢間房傳嚟好熟悉嘅音樂，原來係我嘅歌喎！大家想唔想聽呀？」音樂響起，原來係《狂野之城》，咁啱噚日係1月26號，《狂野之城》嘅第一句歌詞就係「二十六夜，熱力在四射...」非常呼應，唱到中段，千嬅仲同城城一齊jam舞。

合唱之後，千嬅感謝城城專程從內地拍戲趕返港做嘉賓，佢話：「人生之中，喺工作上城城係一個好好嘅模範，係我好尊敬同尊重嘅藝人，我現場睇你每一個騷，都好有力量，好有毅力，係作為後輩好好嘅學習對象，請受我一拜!」千嬅隨即單膝跪，城城亦都陪佢一齊跪。之後千嬅送城城回台下嘅時候，仲話：「各位，我要送城城落台，阻大家30秒！順便抽一抽水先！」